Gəncədə görkəmli bəstəkarın xatirəsi anılıb. Bu haqda 9 may tarixində ADAU-ya istinadən məlumat veririk.
"Ziyalı ömrü" layihəsi çərçivəsində baş tutan tədbir Azərbaycan Dövlət Aqrar Universiteti Aqrar Gənclər Təşkilatının təşkilatçılığı ilə keçirilib. Yığıncaq Şərqdə ilk opera yazan, ilk qadın bəstəkar kimi adını tarixin yaddaşına həkk etdirən dünya şöhrətli Şəfiqə Axundovanın 100 illiyinə həsr olunub.
Burada universitetin tərbiyə işləri üzrə prorektoru Aidə Qasımova dahi bəstəkarın həyat və yaradıcılığından söz açıb. Bildirilib ki, Azərbaycan korifeylərini tanımaq, onların həyat və yaradıcılıqlarını öyrənmək hər bir gəncin borcudur.
Daha sonra bəstəkarın həyat və yaradıcılığı haqqında videoçarxlar nümayiş etdirilib.
Sonda tələbələr tərəfindən hazırlanan ədəbi-bədii kompozisiya təqdim olunub və Şəfiqə Axundovanın repertuarından “Həsrətindən”, “Nədən oldu”, “Mehriban olaq” kimi musiqilər səsləndirilib.
