Rusiyada yaşayan, əslən Gəncədən olan Aleksey Letunov sənədlərinin olmaması səbəbilə tutulub. O, hazırda Moskvanın Xarici Vətəndaşların Saxlanma Mərkəzindədir.
Gencexeber.az-ın məlumatına görə, Letunov Aleksey Nikolayeviç 28 dekabr 1977-ci ildə Gəncə şəhərinin (keçmiş Kirovabad) Kəpəz rayonunda dünyaya gəlib. Sovet Sosialist Respublikaları İttifaqı (SSRİ) dövründə anası ilə birlikdə aerodrom yerləşən hərbi hissənin ərazisində — Sportivnaya küçəsində yaşayıb. Qadın hərbi qulluqçular üçün yemək bişirən aşpaz işləyib. Aleksey isə orta ixtisas təhsili almaq məqsədilə Gəncədəki Çini qablar zavodu yaxınlığındakı peşə məktəbinə qəbul olunub. Elektrik ixtisası üzrə oxusa da, 4 ay sonra təhsilini yarımçıq qoyaraq ailəsinə maddi yardım göstərmək üçün işləməyə başlayıb.
1996-cı ildə hərbi hissədəki qulluqçuların köməyi ilə o, doğum şəhadətnaməsi əsasında Azərbaycanı tərk edərək Rusiyanın Saratov şəhərinə köçüb. Qeyd edək ki, SSRİ dağıldıqdan sonra Aleksey nə Azərbaycan, nə də Rusiya vətəndaşlığını əldə edib. Bu səbəbdən bütün illər ərzində sənədsiz yaşayıb.
Onun atası ilə 6 yaşından əlaqəsi olmayıb, anası isə vəfat edib. Hazırda qohumlarından yalnız ögey qardaşı Sergey Vasilyeviç Balanda (1956-cı il təvəllüdlü) həyatda qalıb. Həmin şəxs Rusiyanın Smolensk vilayətinin Uqranski rayonunun Baskakovka kəndində yaşayır.
Aleksey Letunov bu ilin 8 iyul tarixində Moskvanın Tverskoy rayon polis idarəsi tərəfindən sənədləri olmadığı üçün tutulub. Kişi müvəqqəti olaraq yerləşdirildiyi Xarici Vətəndaşların Saxlanma Mərkəzində iki aydan çoxdur qalmaqdadır. Burada o, iki ilə qədər saxlanıla bilər. Daha sonra sərbəst buraxılsa belə, sənədlərinin olmaması səbəbindən yenidən saxlanılmaq təhlükəsi var.
Letunov etibarlı mənbələrimiz vasitəsi ilə redaksiyamıza bildirib ki, Azərbaycandan və onu tanıya biləcək şəxslərdən kömək istəyir. O, doğma yurduna — Gəncəyə qayıtmaq arzusunda olduğunu açıqlayıb.
