Gəncədə təhlükə saçan tut ağacı ilə bağlı sakinlər narahatlıq keçirirlər.
Gencexeber.az-a daxil olan şikayətə əsasən, Zülfü Hacıyev küçəsindəki 54 saylı evin qarşısında yerləşən köhnə və iri tut ağacı sakinlərin həyatı üçün təhlükə mənbəyinə çevrilib. Onların verdiyi məlumata görə, ağacın iri və qurumuş budaqlarından biri artıq elektrik naqillərinin və həyət evinin ərazisində olan hamamın üzərinə düşüb.
Bildirilib ki, sözügedən vəziyyət hər an ciddi fəsadlara səbəb ola bilər. “Böyük budaqlardan biri elektrik naqillərinə toxunur, həm də hamamın üstünü tutur. Əgər vaxtında budama işləri aparılmazsa, həm maddi zərər, həm də insan həyatı üçün təhlükə yarana bilər,” – sakinlərdən biri qeyd edib.
Sakinlər aidiyyəti qurumlara müraciət edərək, ağacın budanması və ərazidə təhlükəsizliyin təmin olunması üçün operativ tədbirlər görülməsini xahiş edirlər. Onların fikrincə, bu kimi hallarda vaxtında müdaxilə ciddi fəlakətlərin qarşısını ala bilər.
