Gəncədə yol hərəkəti qaydalarını kobud şəkildə pozaraq görüntüləri sosial şəbəkədə paylaşan sürücü cərimə edildi.
Gencexeber.az məlumat verir ki, Gəncə şəhərində sürücünün davranışı şəhər sakinlərinin haqlı narazılığına səbəb olub. Belə ki, “Mercedes” markalı avtomobilin sürücüsü şəhər küçələrində yol hərəkəti qaydalarını açıq şəkildə pozmaqla kifayətlənməyib, bu qanun pozuntusunu videoya çəkərək sosial şəbəkələrdə paylaşmaq cəsarətini də özündə tapıb. O, nümayişkaranə şəkildə işıqforun qırmızı işığına məhəl qoymayaraq piyadaların sıx hərəkət etdikləri ərazidə yolunu davam etdirib.
Daxili İşlər Nazirliyinin Mətbuat Xidmətinin Gəncə regional qrupunun baş inspektoru Eşqin Qasımovun verdiyi məlumata görə, Gəncə Şəhər Baş Polis İdarəsinin əməkdaşları tərəfindən məsələ araşdırılıb. Sürücü S.Həmzəyevə qarşı İnzibati Xətalar Məcəlləsinin 327.2-ci maddəsinə əsasən, işıqforun və ya nizamlayıcının qadağanedici işarəsi verilərkən hərəkətin davam etdirilməsinə görə 100 manat məbləğində cərimə və 3 cərimə balı tətbiq olunub.
