Gəncədə Gəncə Dövlət Universitetinin təşkilatçılığı ilə Azərbaycan dili və ədəbiyyat fənni üzrə orta ümumtəhsil məktəblərinin XI sinif şagirdləri arasında keçirilən olimpiada qaliblərinin mükafatlandırılması baş tutub. Bu haqda 6 iyun tarixində GDU-ya istinadən xəbər veririk.
Tədbirdə olimpiadanın nəticələrinə əsasən, yüksək bal toplayan şagirdlərin adları açıqlanıb. Qeyd edilib ki, 16 nömrəli tam orta məktəbin şagirdi Nuray Sadıqova və Göygöl rayon Üçtəpə kənd orta məktəbin şagirdi Firdus Tağıyeva I yeri, 21 nömrəli tam orta məktəbin şagirdi Şəfa Quliyeva II yeri, 24 nömrəli tam orta məktəbin şagirdi Telli Məmmədova III yeri tutub.
Bilik yarışında yüksək bal topladığına görə 11 şagirdə Fəxri Fərman və mükafat təqdim olunub. Bununla yanaşı, olimpiadanın təşkil olunmasında fəal iştirak etdiyinə görə Universitetin əməkdaşları - Təcrübə və karyera şöbəsinin müdiri Cabbar Qarayevə, Azərbaycan və dünya ədəbiyyatı kafedrasının müdiri Səba Namazovaya və Azərbaycan dili kafedrasının əməkdaşı filologiya üzrə fəlsəfə doktoru Aytən Əhmədovaya Fəxri Fərman və mükafat təqdim olunub.
