Gəncədə intellektual oyunlar festivalı keçirilib. Bu haqda Gencexeber.az-a 29 dekabr tarixində məlumat daxil olub.
“Nizami Kuboku İntellektual Oyunlar Festivalı” layihəsi uğurla başa çatıb. Azərbaycan Gənclər Fondunun maliyyə dəstəyi , Gəncə Dövlət Universitetinin və Gənclərin İnkişaf və Karyera Mərkəzinin Gəncə nümayəndəliyinin təşkilati dəstəyi ilə keçirilən “Nizami Kuboku İntellektual Oyunlar Festivalı” layihəsi Gəncə şəhərində yerləşən universitet və gənclər təşkilatlarının gənclərindən ibarət komandaların iştirakı ilə üç gün ərzində Gəncə Dövlət Universitetində həyata keçirilib.
İlk gün “Nə? Harada? Nə zaman?” intellektual oyunu üzrə turnir keçirilib. Burada I yeri “Vurğun” (ADAU) komandası, II yeri “Tufan” (GDU) komandası, III yeri “Cantis Protectum”(GDU) komandası qazanıb.
Ertəsi gün keçirilmiş “Breyn Rinq” intellektual oyunu üzrə turnirdə I yeri “Cahillər” (ADAU) komandası, II yeri “Tufan” (GDU) komandası, III yeri “Vurğun” (ADAU) komandası tutub.
Daha bir gün sonra “Xəmsə” milli intellektual oyunu üzrə turnirdə isə I yeri “Vurğun” (ADAU) komandası, II yeri “Tufan” (GDU) komandası, III yeri “Akulalar” (GDU) komandası qazanıb.
Layihədə 31 komanda 178 gənc öz intellektual potensiallarını inkişaf etdirib. Qaliblər layihə çərçivəsində diplom, medal və kuboklarla təltif ediliblər.
