Gəncədə şəhər rəhbərliyi Uşaq Evinə baş çəkib. Bu haqda 30 dekabr tarixində İcra Hakimiyyətinə istinadən məlumat veririk.
Niyazi Bayramov Yeni ili və Dünya Azərbaycanlılarının Həmrəylik Gününü Gəncə Uşaq Evində qeyd edib. Tədbirdə icra başçısı Niyazi Bayramov, iş adamı Bəhram Məmmədov və Aparatın məsul əməkdaşları iştirak ediblər. Şəhər rəhbəri uşaqları Dünya Azərbaycanlılarının Həmrəyliyi Günü və Yeni il münasibətilə təbrik edib, onlara xoşbəxt həyat arzulayıb.
Uşaq Evinin sakinləri maraqlı səhnəciklərlə çıxış ediblər. Şənlikdə Şaxta Baba və Qar qız da yer alıb. Balaca fidanlar milli və xarici musiqilərin fonunda çıxış edib, müxtəlif rəqs nümunələri nümayiş etdirib, şeir parçaları səsləndiriblər.
Sonra uşaqlar üçün bayram süfrəsi açılıb, İcra Hakimiyyəti tərəfindən Uşaq Evinin sakinlərinə müxtəlif bayram hədiyyələri təqdim edilib.
