Gəncədə Ağsaqqallar Şurasının təşkilatçılığı ilə tədbir baş tutub. Bu haqda 23 may tarixində Kəpəz televiziyasına istinadən xəbər veririk.
Tədbir Beynəlxalq Narkotik və Narkobiznesə Qarşı Mübarizə Gününə həsr edilib. Burada narkomaniya əleyhinə tədbirlərin daim dövlətin diqqət mərkəzində olduğu qeyd edilib. Narkomaniyanın cəmiyyətə və insanların sağlamlığına ziyanı və onun törətdiyi sosial fəsadlar barədə danışılıb.
“Bu məsələ dünyada bir bəlaya çevrilib. Ağsaqqallar da əlindən gələni edir ki, gənclər nəinki narkomaniya, ümumiyyətlə, siqaret, içki aludəçiliyi kimi pis vərdişlərə yiyələnməsin, yad təsirlər altına düşməsinlər və ağsaqqallarımız bu sahədə əllərindən gələni eləməlidilər. Ümumiyyətlə, gənclərlə bağlı, maarifləndirmə ilə bağlı, dövlət və dövlətçilik məsələlərində İcra Hakimiyyəti ağsaqqalların yanındadır”, - deyə Ağsaqqallar Şurasının sədr müavini qeyd edib.
