Gəncədə narkomaniya ilə əlaqədar tədbir keçirilib. Bu haqda 31 iyul tarixində Regional Mədəniyyət İdarəsinə istinadən xəbər veririk.
"Narkomaniya bəşəriyyət üçün böyük təhlükədir" mövzusunda tədbir Yeni Azərbaycan Partiyası Kəlbəcər Rayon şöbəsinin təşkilatçılığı ilə 16 nömrəli kitabxanada baş tutub. Burada rəsmi şəxslər, gənclər və məktəblilər iştirak ediblər.
YAP-nin sədri Həbib Misirov narkomaniyaya qarşı mübarizəni təmin etmək məqsədilə belə görüşlərin keçirilməsinin mühüm əhəmiyyət daşıdığını söyləyib. Daha sonra tədbirdə Şərqi Zəngəzur Regional Gənclər və İdman İdarəsinin Kəlbəcər sektorunun müdiri Musa Məmmədov, sektorun baş məsləhətçisi Hikmət Şahmuradov və digər şəxslər çıxış ediblər.
Sonda bir daha gənclərə pis vərdişlərdən və ətraflarındakı "ağ ölüm”ə düçar olan şəxslərdən uzaq durmaları tövsiyə edilib.
