Gəncədə təmizlik işləri aparılıb. Bu haqda 17 dekabr tarixində Mənzil Kommunal Təsərrüfatı İstehsalat Birliyinə istinadən məlumat veririk.
Şəhərdə “Təmiz Şəhər” aksiyası həyata keçirilir. Bu gün təşkil olunan ümumşəhər iməciliyində park və xiyabanlarda, küçə və prospektlərdə, yaşayış massivlərinin ətrafında və Gəncəçayın vadisində təmizlik işləri aparılıb. Ərazilərə MKTİB-nin canlı qüvvə və texnikaları cəlb olunub.
Aksiyada prospekt və küçələrin, səki kənarlarının, bordürlərin və buradakı işıq dirəklərinin, yol kənarındakı məhəccərlərin, bir sıra binaların fasadlarının, park və istirahət yerlərində oturacaqların yuyulması həyata keçirilib. Bundan başqa, prospekt və küçələr boyunca yerləşən ictimai iaşə, ticarət və digər obyektlərin vitrinləri, köşklər və avtobus dayanacaqları yuyulub, ətrafı təmizlənib. Yaşayış binalarında, həyət və yaşayış məhəllələrində, məişət tullantılarının atıldığı konteyner meydançalarının ətrafında əlavə təmizlik işləri görülüb.
