Gəncədə parkda yaşayan 67 yaşlı kişi qocalar evinə qəbul edilməsini istəyir.
Gencexeber.az məlumat verir ki, Gəncə şəhərində 67 yaşlı Xaliq Mirzəyev Mehralı oğlu bir həftədən çoxdur ki, 3-cü mikrorayon ərazisində – Elbrus Allahverdiyev və Şah İsmayıl Xətai prospektlərinin kəsişməsində yerləşən parkda skamyanın üstündə gecələyir.
O, redaksiyamıza açıqlamasında bildirib ki, əvvəllər şəhər ərazisində daxmada yaşayıb, lakin bir müddət öncə oradan çıxarılıb. Qocalar evinə müraciət etdiyini, lakin 70 yaşı olmadığına görə qəbul edilmədiyini deyib.
Xaliq Mirzəyev həmçinin qeyd edib ki, bundan əvvəl 10 ay Gəncə Abbas Səhhət adına xəstəxanada qalıb, daha sonra buradan da çıxarılıb. O, hazırda çəliklə çətinliklə hərəkət edir və parkdakı skamyada gecələyir.
Sakinlərin sözlərinə görə, Xaliq Mirzəyev qürurlu insandır, kimsədən heç nə istəmir. Pensiya aldığını da açıqlayıb.
Kişinin sözlərinə görə, 2002-ci ildə dələduzluğun qurbanı olub, aldadılaraq evi satılıb və mülksüz qalıb. Artıq 23 ildir ki, küçələrdə yaşayır.
"Xahiş edirəm, məni qocalar evinə yerləşdirin", - X.Mirzəyev yardım üçün səslənib.
