Gəncə şəhərinin Dədə Qorqud küçəsində yaşayan sakinlər məhəllələrində çayxananın açılmasından narazılıq edirlər.
Gencexeber.az-a daxil olan çoxsaylı şikayətlərə əsasən, özünü qazi kimi təqdim edən şəxs ərazidə yerləşən 32 mənzilli yaşayış evinin həyətində çayxana açmaq istəyir. O, sakinlərə köhnə mərasim evini təmir etdirəcəyini bildirib.
Sakinlərin iddiasına görə, həmin şəxs özünü müharibə veteranı kimi təqdim edərkən “Mən qaziyəm, mənə olar” – ifadəsini işlətməkdən də çəkinməyib.
Vətəndaşlar bildirirlər ki, burada çayxananın fəaliyyət göstərməsi ailələrin, xüsusilə də uşaqların rahatlığına və təhlükəsizliyinə ciddi təsir göstərəcək. Onların sözlərinə görə, yaşayış binalarının arasında ictimai iaşə obyektinin açılması həm səs-küy, həm də digər sosial problemlərə yol aça bilər.
Sakinlər məsələ ilə bağlı aidiyyəti qurumlardan məhəllədə çayxananın fəaliyyətinə icazə verilməməsini tələb etdiklərini bildiriblər.
