Gəncədə sakinlər məhəllələrinin baxımsız olmasından narahatdırlar. Bu haqda 24 may tarixində Real Tv-yə istinadən xəbər veririk.
Söhbət Mahrasa bağı adlanan yaşayış massivindən gedir. Sakinlərin sözlərinə görə, burada 2023-ci ilə qədər attraksionlar, futbol meydançası, yelləncəklər və sakinlərin rahatlığını təmin edəcək hər cür şərait olub. Onlar daha sonra ərazidə aidiyyəti qurumların birinin tikinti işləri aparacağı haqqında məlumat alıblar. Sakinlər bu məsələnin qarşısını alsalar da, gecə saatlarında həyətdəki stadionun bütün avadanlıqları sökülərək ərazidən daşınıb.
Məsələ ilə bağlı sakinlər İcra Hakimiyyəti ilə əlaqə saxlayıblar. Onlara bildirilib ki, şəhərdə içməli su və kanalizasiya sistemlərinin yenilənməsi məqsədi ilə hazırda Mahrasa bağı adlanan ərazidə yeni layihələr icra olunur. Sözügedən layihənin icrası tam yekunlaşdıqdan sonra isə burada abadlıq işlərinə start veriləcək.
