Gəncədə mənzil qıtlığı yaşanır. Bu haqda 27 iyul tarixində Kəpəz televiziyasına istinadən məlumat veririk.
Nizami yurduna təhsil almaq üçün üz tutan tələbələrin axını kirayə mənzillərin sayında azalmaya səbəb olmuşdu. Tədris ilinin bitməsi ilə bu problemin aradan qalxması gözlənilsə də, hazırda əksi müşahidə edilir. Bildirilir ki, tələbələr yay aylarında evləri təhvil vermirlər.
Universitet və kolleclərdə təhsil alan tələbələrin əksəriyyəti doğma evlərinə qayıdıblar. Tələbat azalsa da, gözlənilənin əksinə, qiymətlər artıb. Rieltorların sözlərinə görə, kirayə mənzil bazarında 20 faizə kimi artım müşahidə olunur. Onlar bildirirlər ki, sentyabr ayında vəziyyət daha da çətinləşəcək. Həm qiymət bahalaşacaq, həm də tələbat artacaq.
Həmçinin qeyd olunub ki, satışa çıxarılan mənzillərdə də günü-gündən qiymətlər artır. Bu fakt şəhərin bütün zonalarında müşahidə edilir.
