Gəncədə sinif rəhbərləri üçün kurslar keçirilib. Bu haqda 28 sentyabr tarixində FHN-ə istinadən məlumat veririk.
Təlimlər Fövqəladə Hallar Nazirliyinin Gəncə Regional Mərkəzi tərəfindən təşkil olunub. Mərkəzin əhatə etdiyi ərazi üzrə şəhər və rayon ümumtəhsil orta məktəblərinin və onlara bərabər tutulan təhsil müəssisələrinin mülki müdafiə fənnini tədris edən 2-ci, 5-ci və 6-cı sinif rəhbərləri üçün kurslar baş tutub.
Burada FHN-in Gəncə Regional Mərkəzinin, yerli icra hakimiyyətlərinin məsul şəxsləri, Gəncə-Daşkəsən və Qazax-Tovuz Regional Təhsil idarələrinin, şəhər və rayon Təhsil sektorlarının və regionda fəaliyyət göstərən mərkəzi xəstəxanaların əməkdaşları iştirak ediblər. Dinləyicilərə fərdi mühafizə vasitələrindən istifadə, təbii və texnogen xarakterli fövqəladə hadisələr zamanı düzgün davranış, təxliyə planlarının hazırlanması qaydaları, mülki müdafiə, yanğın və texniki təhlükəsizlik tədbirləri haqqında ətraflı məlumatlar verilib, mövzularla bağlı hazırlanmış fotoslayd və videoçarxlar nümayiş olunub.
Kursların məqsədi məktəblərdə mülki müdafiəni tədris edən sinif rəhbərlərinin bu sahə üzrə bilik və bacarıqlarının artırılmasıdır.
