Gəncədə təhsil müəssisələri yoxlanılır. Bu haqda 22 may tarixində Regional Təhsil İdarəsinə istinadən məlumat veririk.
Monitorinqlər Gəncə-Daşkəsən Regional Təhsil İdarəsi və Şəhər Polis İdarəsinin birgə təşkilatçılığı ilə keçirilir. Burada hər iki qurumun nümayəndələri və valideyn icmasının üzvləri iştirak edirlər.
Tədbirlər zamanı məktəblilərin “Ümumi təhsil müəssisələrində şagird davranış qaydaları”na əməl etməsi vəziyyəti müşahidə olunub, təhsil ocağına gətirilməsi qadağan olunan əşya və ləvazimatlar haqqında maarifləndirmə işi aparılıb, məktəbli formalarından istifadənin zəruriliyi və digər müvafiq məsələlərlə bağlı şagirdlərə tövsiyələr verilib.
Qeyd edək ki, monitorinqlərin məqsədi məktəblərdə daxili nizam-intizam qaydalarına əməl olunmasına nəzarətin artırılması və təhlükəsizlik tədbirlərinin gücləndirilməsidir.
