Gəncədə yaşıl dünya ilə bağlı tədbir təşkil edilib. Bu haqda 3 may tarixində İcra Hakimiyyətinə istinadən məlumat veririk.
“Mədəniyyət vasitəsilə yaşıl həyata çağırış” layihəsinin təqdimatı baş tutub. Proqram İcra Hakimiyyəti və Gəncə-Daşkəsən Regional Mədəniyyət İdarəsinin dəstəyi, Gəncə şəhər Heydər Əliyev Mərkəzinin təşkilatçılığı ilə keçirilir.
Tədbirdə icra başçısının müavini Adil Tağıyev, Yeni Azərbaycan Partiyası Gəncə Şəhər Təşkilatının sədri Bayram Aslanov, Gəncə-Daşkəsən Regional Mədəniyyət İdarəsinin rəisi Pərvin Kazımov, şəhərdə fəaliyyət göstərən idarə, müəssisə və təşkilat rəhbərləri, həmçinin ictimaiyyət nümayəndələri iştirak ediblər. Burada bir sıra rəsmilərin çıxışları dinlənilib.
Sonra dünyanın müxtəlif yerlərində çəkilmiş təbiət şəkillərindən, Gəncə Uşaq Rəssamlıq Məktəbinin şagirdlərinin əl işlərindən və ekologiyaya aid kitablardan ibarət sərgiyə baxış keçirilib. Həmin vaxt Gəncə Dövlət Filarmoniyasının Kamera Orkestrinin ifasında müxtəlif həzin musiqilər səsləndirilib.
Yekunda mövzu ətrafında fikir mübadiləsi aparılıb.
