Gəncədə futbolçular Uşaq Evini ziyarət ediblər. Bu haqda 29 dekabr tarixində “Kəpəz” futbol klubuna istinadən məlumat veririk.
Zİyarət 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə baş tutub. “Kəpəz” PFK-nın İdarə Heyətinin sədri İlqar Nadiri, idman direktoru Mehman Allahverdiyev və əsas komandanın baş məşqçisi Tərlan Əhmədov başda olmaqla məşqçilər korpusu və futbolçular Uşaq Evinin balaca sakinləri ilə görüşüblər. Onlara bayram sovqatı çatdırıb, toplar hədiyyə ediblər. Uşaqlar Vətənə və yeni ilə aid şeirlər və mahnılar səsləndiriblər.
Klubun kollektivi Vətən müharibəsi şəhidi Əmrah Rajapovun xatirə guşəsini də ziyarət edib. Gəncə Uşaq Evinin sakini olmuş Əmrah Rajapov “Kəpəz”ə olan hədsiz sevgisi ilə tanınıb, ev və səfər oyunlarında komandaya tribunadan dəstək verib.
Ziyarət dostluq matçı ilə başa çatıb. Uşaq Evinin sakinlərindən ibarət komanda “Kəpəz”ə qarşı oynayıb. Görüş ev sahiblərinin 4:3 hesablı qələbəsi ilə yekunlaşıb.
