Bu gün şəhidlər İsmayıl Mustafayev və Ayxan Musayevin döğum günüdür.
İsmayıl Elmar oğlu Mustafayev 22 sentyabr 1996-cı ildə Gəncədə anadan olub. 43 nömrəli tam orta məktəbi bitirib. 2012-2015-ci illərdə Dövlət Peşə Təhsil Mərkəzində təhsil alıb. 2015-ci ildə həqiqi hərbi xidmətə çağırılıb.
O, 28 sentyabr 2020-ci ildə Vətən Müharibəsinin başlaması ilə əlaqədar yenidən hərbi xidmətə çağırılıb. Füzuli və Cəbrayıl rayonları, Şuşa və Xankəndi şəhərləri istiqamətində gedən döyüşlərdə iştirak edib.
İsmayıl Elmar oğlu Mustafayev 8 noyabr 2020-ci ildə Xankəndi ərazisində gedən döyüşlərdə şəhidlik zirvəsinə ucalıb. Şəhidimiz 17 noyabr tarixində Gəncə şəhərinin Şəhidlər xiyabanında dəfn olunub.
O, ölümündən sonra prezident tərəfindən “Vətən uğrunda”, “Cəsur döyüşçü” və “Şuşanın azad olunmasına görə” medalları ilə təltif olunub.
Ayxan Mehman oğlu Musayev 22 sentyabr 2000-ci ildə Gəncədə anadan olub. 6 saylı tam orta məktəbdə təhsil alıb. Ticarət və Xidmət üzrə Dövlət Peşə Təhsil Mərkəzinin Qaz qaynaqçısı ixtisasını bitirib.
Ayxan 2019-cu ildə həqiqi hərbi xidmətə çağırılıb. "Azərbaycan-Türkiyə birgə döyüş atışlı taktiki təlim”də və "Azərbaycan uğrunda ən yaxşı bölük" adlı yarışda əldə etdiyi nailiyyətlərə görə mükafatlandırılıb.
O, 27 sentyabr 2020-ci il tarixində Vətən müharibəsinə qatılıb. Füzuli, Xocavənd və Cəbrayıl rayonları, habelə Şuşa şəhəri uğrunda gedən döyüşlərdə iştirak edib.
Ayxan Mehman oğlu Musayev 8 noyabr 2020-ci ildə Şuşa şəhəri ətrafında gedən döyüşlərdə yaralanıb, ilkin tibbi yardımdan sonra Silahlı Qüvvələrin Baş Klinik Hospitalına gətirilib. Həkimlərin səyinə baxmayaraq, 20 gün koma vəziyyətində qaldıqdan sonra 28 noyabr tarixində şəhidlik zirvəsinə ucalıb. Şəhidimiz növbəti gün Gəncə şəhərinin Şəhidlər xiyabanında dəfn edilib.
Ölümündən sonra prezident tərəfindən “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif edilib.
