Gəncədə universitet əməkdaşları şəhid ailəsini ziyarət ediblər. Bu haqda 27 sentyabr tarixində ATU-ya istinadən xəbər veririk.
Azərbaycan Texnologiya Universitetinin tələbəsi olan şəhid Ruslan Məmmədovun ailəsinə universitetin əməkdaşları baş çəkiblər. Ailə ilə söhbət zamanı təhsil müəssisəsinin Ruslanla daim fəxr etdiyi və digər tələbələrimiz üçün vətənpərvərlik nümunəsi olduğu bildirilib. Daha sonra şəhidimizin məzarı ziyarət olunub.
Görüşdə Elm və innovasiyalar üzrə prorektor vəzifəsini müvəqqəti icra edən Mayıs Gülalıyev, Ümumi və tətbiqi fizika kafedrasının müdiri Məntiq Cəfərov, Ümumi və tətbiqi riyaziyyat kafedrasının müdiri Hamlet Kəsəmənli, Kimya və metallurgiya mühəndisliyi kafedrasının müdiri Musa Cəfərov, Yüngül sənaye mühəndisliyi və dizayn kafedrasının müdiri Tofiq Mirzəyev iştirak ediblər.
Qeyd edək ki, Ruslan Məmmədov Suqovuşanın azadlığı uğrunda döyüşüb. Prezident tərəfindən "Vətən uğrunda”, "Suqovuşanın azad olunmasına görə" və "Laçının azad olunmasına görə" medalları ilə təltif edilib.
