Bu gün şəhid Əmrah Rajapovun torpağa tapşırılmasının ildönümüdür. Bu haqda Gencexeber.az 23 fevral tarixində məlumat verir.
Şəhidlər xiyabanında şəhidimizin xatirəsi anılıb. Onun əziz xatirəsinə dualar oxunub, məzarına tər güllər düzülüb. Mərasimdə şəhid ailələri, şəhidin yaxınları və tanışları iştirak ediblər. Daha sonra qurulan mağarda ehsan verilib.
Əmrah Rajapov 11 dekabr 2000-ci ildə Goranboy rayonunun Zeyvə kəndində anadan olub. 2012-ci ildə ana nənəsi Minayə Əliyeva tərəfindən Gəncə Uşaq Evinə yerləşdirilib.
Kimsəsiz olduğu üçün 2017-ci ildə Heydər Əliyev Fondu tərəfindən Bakı şəhəri, Abşeron rayon, Masazır qəsəbəsində internat məktəbləri və uşaq evlərinin məzunları üçün yaradılmış “Məzun evi”ndə bir otaqlı mənzillə təmin olunub.
2019-cu ildə Əmrah həqiqi hərbi xidmətə çağırılıb. Vətən müharibəsi zamanı Füzuli rayonunun azadlığı uğrunda gedən döyüşlərdə iştirak edib. Əmrah Rajapov 8 oktyabr 2020-ci ildə elə buradaca şəhidlik zirvəsinə ucalıb.
O, 23 fevral 2021-ci ildə Gəncə şəhərinin Şəhidlər xiyabanında dəfn edilib.
Xatırladaq ki, bir müddət öncə şəhidin anasının kimliyi məlum olub.
