Regional Mədəniyyət İdarəsi, Gəncə şəhər Heydər Əliyev Mərkəzi, 4 nömrəli Uşaq Musiqi Məktəbi və 16 nömrəli Kitabxana tədbir təşkil edib. Bu haqda 8 may tarixində Heydər Əliyev Mərkəzinə istinadən xəbər veririk.
Ümummilli lider Heydər Əliyevin anadan olmasının 101 illiyi ilə əlaqədar “Tarixi şəxsiyyət və tarixi yaradan şəxsiyyət” mövzusunda ədəbi-bədii gecə keçirilib. Burada Heydər Əliyevin zəngin həyat yolu və çoxşaxəli fəaliyyəti haqqında danışıblar. Qeyd edilib ki, ulu öndər bütün həyatını xalqa sədaqətlə xidmətə həsr etmiş, öz fəaliyyətində həmişə xalqa arxalanmış, ən çətin anlarda ona müraciət etmişdir. Azərbaycan xalqı da heç vaxt ondan dəstəyini əsirgəməmişdir.
Tədbirdə Gəncə şəhər 4 nömrəli Uşaq Musiqi Məktəbinin kiçik xor kollektivinin ifasında “Heydər babamızın nəvələriyik” mahnısı, müəllim və şagirdlərinin ifasında Azərbaycan bəstəkarlarının mahnıları ifa olunub. Fizika, Riyaziyyat və İnformatika Təmayüllü liseyin şagirdləri “Mən fəxr edirəm ki, azərbaycanlıyam” mahnısının fləş-mobunu nümayiş etdiriblər. Sonda 20 nömrəli tam orta məktəbin şagirdləri “Heydər xalqım deyəcək, xalq Heydər söyləyəcək” mahnısını ifa ediblər.
