“Hacıqabul Quşçuluq Şirkəti” MMC-nin əməkdaşları Gəncədə Azərbaycan Dövlət Aqrar Universitetinin bir qrup tələbəsi ilə görüş keçiriblər. Bu haqda 22 may tarixində ADAU-ya istinadən xəbər veririk.
Görüşdə tələbələrə Zaqafqaziyanın ən böyük yumurta istehsalçısı olan Hacıqabul Quşçuluq Şirkəti haqqında məlumat verilib. Bildirilib ki, şirkətin missiyası yüksək keyfiyyət və uyğun qiymət təqdim edə bilmək üçün peşəkar və təcrübəli əməkdaşlarla daima çalışmaq və bazarı düzgün təhlil edərək müştərilərin ehtiyaclarını yüksək səviyyədə qarşılamaqdan ibarətdir. Buna görə də kadr seçimi zamanı, xüsusilə ADAU məzunlarına önəm verildiyi diqqətə çatdırılıb.
Həmçinin görüş zamanı müəssisədə olan iş imkanları ilə bağlı tələbələrə məlumat verilərək uyğun namizədlərin müraciəti qeydiyyata alınıb.
