Gəncədə həvəskar bəstəkar Svetlana Hüseynovanın yaradıcılıq gecəsi baş tutub. Bu haqda 31 may tarixində Kəpəz televiziyasına istinadən xəbər veririk.
Dövlət Filarmoniyasında keçirilən musiqili gecəyə şəhərin musiqi ictimaiyyətinin nümayəndələri qatılıblar. Musiqiçi-pedaqoqun fəaliyyətindən, yaradıcılığından söz açılıb. İxtisası üzrə çalışdığı müəssisələrdə qazandığı uğurlar diqqətə çatdırılıb. Onun Azərbaycan klassik musiqisinə olan marağından, ədəbiyyat dünyasının parlaq simalarının əsərlərinə müraciət etdiyindən danışılıb.
Konsertdə Svetlana Zelmixanqızının təqdimatında özünün bəstələdiyi musiqilər təqdim olunub. Onun müşayiəti altında lirik musiqilərlə yanaşı, vətənpərvər ruhda nota alınan əsərlər də səslənib. Svetlana Zelmixanqızının sözlərinə görə, bu, onun 5-ci müəllif konsertidir. O, digər konsertlərini Heydər Əliyev Mərkəzində ulu öndərimizin 100 illiyinə həsr edib: “Konsertdə klassik şairlərimizin - Məhsəti Gəncəvinin, Nizami Gəncəvinin sözlərinə yazdığım mahnıları “Gəncəm” triosu böyük uğurla ifa edib”, - deyə Svetlana qeyd edib.
