Goranboyda baş verən qəzada ölən şəxslə bağlı bəzi detallar məlum olub.
Teleqraf.аz xəbər verir ki, rayonun Zeyvə kəndi yaxınlığında baş verən yol-nəqliyyat hadisəsi zamanı ölən Məhəmməd Bayramov ailənin tək oğlu idi.
Belə ki, Səfikürd kənd sakini olan M.Bayramov nişanlı imiş, mart ayında toyu olacaqmış.
Onun atası Talıb Bayramov isə Birinci Qarabağ müharibəsinin veteranıdır.
Məhəmmədin ailəsi Səfikürd kəndində yaşayır, əsasən təsərrüfatla məşğuldur.
9 fevral, 21:21
Goranboyda baş verən qəzada ölən və xəsarət alanların kimliyi məlum olub.
Gencexeber.az-ın məlumatına görə, bu gün Goranboy-Ağcakənd avtomobil yolunun Zeyvə kəndindən keçən hissəsində Səfikürd kənd sakini 17.05.2003-cü il təvəllüdlü Bayramov Məhəmməd Talıb oğlunun idarə etdiyi "VAZ-2107" markalı 22 BL 409 dövlət qeydiyyat nişanlı avtomobil, Qaradağ rayonunda qeydiyyatda olub Aşağı Ağcakənd qəsəbəsində müvəqqəti yaşayan 01.07.1995-ci il təvəllüdlü Hüseynzadə Vahid Mobil oğlunun idarə etdiyi "Pikap" markalı 77 QA 567 dövlət qeydiyyat nişanlı avtomobil ilə toqquşub.
Qəza nəticəsində Məhəmməd Bayramov vəfat edib. Onun maşınında olan digər sərnişinlər - Səfikürd kənd sakinləri 18.01.2001-ci il təvəllüdlü Allahverdiyev Mehman Aydın oğlu,18.02.2001-ci il təvəllüdlü Babayev Uğur Ceyhun oğlu və 12.06 2001-ci il təvəllüdlü Allahyarov Məftun Namiq oğlu müxtəlif dərəcəli bədən xəsarətləri alaraq Goranboy rayon Mərkəzi Xəstəxanasına yerləşdirilib.
"Pikap"ın sürücüsü və sərnişinlər - Aşağı Ağcakənd qəsəbəsində müvəqqəti yaşayan 06.15.1980-ci il təvəllüdlü Hacıbabayev Samir Gülbaba oğlu, 09.11.1971-ci il təvəllüdlü Qasımova Zəminə Rəfail qızı müxtəlif bədən xəsarətləri ilə Goranboy rayon Mərkəzi Xəstəxanasına yeləşdirilib.
20:56
Goranboyun Zeyvə kəndində "VAZ-2107" markalı avtomobil "Pikap" markalı maşınla toqquşub.
Gencexeber.az -ın məlumatına əsasən, qəza nəticəsində 1 nəfər hadisə yerində dünyasını dəyişib. Daha bir neçə nəfər yaralanıb, onlar Goranboy rayon Mərkəzi Xəstəxanasına yerləşdirilib.
Faktla bağlı araşdırma aparılır.
