Gəncə Dövlət Universitetinin əməkdaşları Goranboy məktəblərinin kollektivi və şagirdləri ilə görüşüblər. Bu haqda 27 dekabr tarixində universitetə istinadən məlumat veririk.
Görüşdə Goranboy rayonu üzrə 30-a yaxın orta ümumtəhsil məktəbinin kollektivi və şagirdləri iştirak ediblər. Goranboy rayon təhsil sektorunun müdiri Xəyal Məmmədov tədbirin əsas məqsədinin Gəncə Dövlət Universiteti ilə rayon üzrə orta ümumtəhsil məktəbləri arasında ikitərəfli əməkdaşlıq əlaqələrinin yaradılması, şagirdlərə ali məktəbin fəaliyyəti barədə ətraflı məlumat vermək olduğunu bildirib.
GDU-nun əməkdaşları ali məktəbin fakültələri, ixtisasları, tədris binaları, kitabxanaları, tələbə yataqxanası və universitetin beynəlxalq əlaqələri barədə məlumat veriblər. Tədbirin sonunda universitetin fəaliyyətini əks etdirən bukletlər, diyircəkli qələmlər və bloknotlar şagirdlərə təqdim olunub.
