Xəbər verdiyimiz kimi, Gəncə şəhərinin ictimai nəqliyyat sistemi yenilənmək üzrədir. Hazırda Çin istehsalı olan “Foton” markalı yeni avtobuslar ölkəyə gətirilib və Bakıda gömrük prosedurlarından keçib.
Gencexeber.az-ın məlumatına görə, nəqliyyat vasitələri hələlik paytaxtda saxlanılır. Səbəb Gəncədə “BakuBus” MMC-yə məxsus yeni avtobus parkında tikinti işlərinin davam etməsidir. Tikinti başa çatmadığı üçün avtobusların şəhərə gətirilməsi bir qədər təxirə salınıb. Əldə etdiyimiz məlumata görə, iyul ayının sonuna qədər park istifadəyə veriləcək və bundan sonra avtobuslar Gəncəyə göndəriləcək.
Bununla yanaşı, Gəncəyə 12 metrlik “BMC” və “İveco” markalı əlavə avtobusların gətirilməsi də planlaşdırılır. Bu addımlar şəhərin nəqliyyat infrastrukturunun müasirləşdirilməsi və sərnişinlərin rahatlığının təmin olunması məqsədi daşıyır.
Qeyd edək ki, Azərbaycan Yerüstü Nəqliyyat Agentliyi tərəfindən hazırda Gəncədə fəaliyyət göstərən 20-dən çox müntəzəm marşrut xətti üzrə sərnişindaşıma hüququ ilə bağlı müsabiqə elan olunub. Müsabiqədə iştirak üçün ərizə qəbulu iyulun 11-i saat 17:00-da yekunlaşacaq.
