Gəncədə bir neçə ünvanda kommunal infrastrukturla bağlı ciddi problemlər yaşanır.
Gencexeber.az-a daxil olan şikayətlərə əsasən, şəhərin müxtəlif ərazilərində vəziyyət getdikcə daha da acınacaqlı hal alır.
Atatürk prospektində binanın zirzəmisini üfunət bürüyüb
Atatürk prospekti 235-241 nömrəli çoxmənzilli binada da vəziyyət kritikdir. Kanalizasiya sistemində baş vermiş qəza səbəbilə çirkab suları binanın zirzəmisinə dolub. Bina ümumilikdə qəzalı vəziyyətdədir — nə yağış sularını axıtmaq üçün novdan sistemi var, nə də elektrik xətləri düzgün çəkilib. Bu, sakinlər üçün həm antisanitariya, həm də təhlükəsizlik baxımından böyük risk yaradır.
Nigar Rəfibəyli küçəsində palçıq dənizi
Dəmiryolu vağzalı yaxınlığında yerləşən Nigar Rəfibəyli küçəsində (6-cı küçə) kanalizasiya sistemi ümumiyyətlə mövcud deyil. Bu səbəbdən çirkab sular birbaşa küçəyə axır. Hazırda ərazidə vəziyyət daha da ağırlaşıb — su borusunun partlaması nəticəsində torpaqla qarışan su küçəni palçıq dənizinə çevirib. Antisanitariya və qoxu əhali üçün dözülməz hala gəlib.
Ağa Mirzə Əhmədov küçəsində hasar uçmaq üzrədir
Ağa Mirzə Əhmədov küçəsi, ev 18-in qarşısında yerləşən həyətyanı sahənin yanından keçən köhnə bərə uzun müddətdir baxımsız vəziyyətdədir. İndi isə bu bərə zibillərlə dolaraq tıxanıb, daşan çirkab sular hasarın dibini yuyub, iri çala yaradıb. Nəticədə hasarın özülü boşalıb və onun istənilən an uçma riski var. Sakinlər təhlükənin qarşısının alınması üçün təcili tədbirlərin görülməsini tələb edirlər.
Üzeyir Hacıbəyli küçəsində yataqxana bataqlığa dönüb
Gəncədə 80-dən çox ailənin yaşadığı yataqxanada da uzun müddətdir kanalizasiya problemi yaşanır. Üzeyir Hacıbəyli küçəsi, döngə 4, bina 1 ünvanında yerləşən keçmiş toxuculuq fabrikinin binası SSSR-i dövründən qalma infrastruktura malikdir. İllərdir baxımsız qalan bu yaşayış yerində kanalizasiya aylardır daşır və ətrafı dözülməz qoxu bürüyüb. Sakinlər dəfələrlə müvafiq qurumlara müraciət etsələr də, hələ də heç bir tədbir görülməyib.
Sakinlərin səsləndirdiyi ümumi çağırış: “Kommunal iflasın qarşısı alınsın”
Şikayətlər göstərir ki, Gəncənin bir çox ərazisində kommunal infrastruktur ya mövcud deyil, ya da bərbad vəziyyətdədir. Sakinlər aidiyyəti qurumlardan problemin həllini sürətləndirməyi və insan sağlamlığı üçün real təhlükə yaradan antisanitar şəraitin aradan qaldırılmasını tələb edirlər.
