Gəncə şəhərinin Heydər Əliyev prospektində yerləşən 81, 83, 83a və 85 nömrəli binaların qarşısındakı vəziyyət sakinlərin narazılığına səbəb olub.
Gencexeber.az-ın məlumatına görə, bir müddət əvvəl ərazidə müxtəlif qurumlar tərəfindən qazıntı işləri aparılıb və mövcud asfalt örtüyü dağıdılıb. Lakin işlər yekunlaşdıqdan sonra yeni asfalt çəkilməyib. Nəticədə prospektin həmin hissəsi aylardır baxımsız vəziyyətdə qalıb.
Sakinlərin sözlərinə görə, hazırda 200-dən artıq ailə yayda tozdan, qışda isə palçıqdan ciddi əziyyət çəkir. Onlar məsələ ilə bağlı aidiyyəti qurumlara dəfələrlə müraciət ediblər, lakin hələlik heç bir tədbir görülməyib.
Sakinlərin sözlərinə görə, problemlə bağlı Gəncə Şəhər İcra Hakimiyyətindən bildirilib ki, şəhərdə həyata keçirilən abadlıq işləri çərçivəsində prospektin sözügedən hissəsində də mərhələli şəkildə asfaltlama işləri aparılacaq.
