Gəncə şəhərinin bir sıra ərazilərində məişət tullantıları üçün nəzərdə tutulan zibil konteynerləri vaxtında daşınmır.
Gencexeber.az-a daxil olan çoxsaylı şikayətlərə əəsasən, şəhərin müxtəlif yerlərində küçə və məhəllələrdə natəmizlik hökm sürür, ətrafa üfunət yayılır. Acınacaqlı mənzərə Üzeyir Hacıbəyov və Adil Xan Ziyadxanov küçələrində, eləcə də “Sərçə bazarı” yaxınlığında, 29 nömrəli məktəbin ətrafında müşahidə olunur.
Şəhid Rövşən Qurbanov küçəsində sakinlərin sözlərinə görə isə, kənar küçələrdən gətirilən zibil əraziyə atılır. Onların dəfələrlə müraciət etmələrinə baxmayaraq, təmizlik işləri görülməyib.
Əziz Nəzərov və Elbrus Nəzərov küçələrində də eyni problem hökm sürür. Sakinlər zibilin yığılıb qaldığını, üfunətin ətrafı bürüdüyünü bildirirlər.
Cavadxan qəsəbəsində zibillərin yandırılması ilə bağlı ekoloji dəhşət yaşanır. Sakinlər iy-qoxudan pəncərə aça bilmədiklərini, uşaqların və qocaların əziyyət çəkdiyini deyirlər.
Bundan başqa, Zərrabı küçəsi 1-ci döngənin girişində yerləşdirilən üç konteyner həm yolun hərəkət hissəsini daraldır, həm də məhəlləyə natəmizlik gətirib. Darısqal yoldan keçən avtomobillərə maneə yaranır, üstəlik bura yalnız məişət tullantıları deyil, təmir qalıqları və köhnə ev əşyaları da atılır. Sahibsiz itlərin toplanması isə azyaşlılar və yaşlı sakinlər üçün təhlükə yaradır.
Konteynerlərə yaxın binalarda yaşayanlar bildirirlər ki, üfunət səbəbindən pəncərələri açmaq mümkün deyil. Qablar üçün əvvəl işıqfor yaxınlığında yer ayrıldığı halda, sonradan konteynerlərin köçürülməsi narazılıq doğurub.
Şəhər sakinləri aidiyyəti qurumlardan zibilin vaxtında daşınmasını, ərazilərin dezinfeksiya edilməsini və tullantıların yandırılmasına son qoyulmasını tələb edirlər.
