Gəncə şəhərində təmizlik işçilərinə kobud davranışın sərgilənməsi iddia edilib.
Gencexeber.az-a daxil olan çoxsaylı şikayətlərə əsasən, Gəncə şəhər Mənzil Kommunal Təsərrüfatı İstehsalat Birliyinin (MKTİB) şəhərin mərkəzində yerləşən xidmət sahəsində üzücü mənzərə yaşanır. Şəhər sakinlərinin iddialarına görə, qurumun təmizlik işlərinə nəzarət edən qadın əməkdaşı hər səhər tabeliyində olan xanım işçilərlə kobud şəkildə davranır.
İddia edilib ki, qadın rəhbər hər səhər təmizlik işlərinə başlayan əməkdaşlara qarşı səs tonunu qaldırır, kobud şəkildə göstərişlər verir və bu hal demək olar ki, hər gün şəhər sakinlərinin gözü qarşısında təkrarlanır.
"Biz hər səhər buradan keçirik, qadının necə əsəbi şəkildə danışdığını eşidirik. İşçilər isə başlarını aşağı salıb sakitcə dinləyirlər", – sakinlərdən biri iddia edib.
