Gəncə şəhərində dahi şair Nizami Gəncəviyə həsr olunmuş “Xəmsə” abidə kompleksindəki fəvvarə fəaliyyət göstərmir.
Gencexeber.az-a daxil olan şikayətə əsasən, su axını tamamilə dayanıb, fəvvarənin konstruksiyası isə baxımsız və köhnəlmiş vəziyyətdədir. Ümumi görüntü estetik baxımdan səliqəsizdir və bu, şəhər sakinləri tərəfindən narazılıqla qarşılanır.
Qeyd edək ki, “Xəmsə” abidə kompleksinin açılışı 2012-ci ilin yanvar ayında Prezident İlham Əliyevin iştirakı ilə baş tutub.
Nizami Gəncəvinin əsərlərinin motivlərinə həsr olunmuş kompleksin inşasında qədim Azərbaycan memarlığına istinad edilib. “Xəmsə” abidə kompleksi 8 künc, bürc, şam, çarhovuz və digər elementlərdən istifadə edilərək ucaldılıb.
Bədii kompozisiyada Nizami Gəncəvinin “Leyli və Məcnun”, “Sirlər xəzinəsi”, “Yeddi gözəl”, “Xosrov və Şirin”, “İskəndərnamə” poemalarının hər birinə aid abidə qoyulub. Bununla da Nizami yaradıcılığını əks etdirən son dərəcə nadir bir sənət abidəsi ərsəyə gəlib.
