Gəncənin Zülfü Hacıyev küçəsində iki aydır işıqlandırılmır.
Gencexeber.az-a şikayətlərini bildirən vətəndaşların sözlərinə görə, Zülfü Hacıyev küçəsinin sakinləri artıq iki aydır qaranlıqda yaşamağa məcbur qalır. Küçədə bir müddət öncə yeni işıq dirəkləri quraşdırılsa da, onlardan cəmi birində lampa yanır. Bu da 3 kilometrdən çox uzunluğu olan geniş ərazidə ciddi çatışmazlıq yaradır.
Gecə saatlarında küçə zülmətə bürünür, bu isə piyada və sürücülər üçün əlavə təhlükələrin yaranmasına gətirib çıxarır.
“Gecələr küçəyə çıxmağa qorxuruq. Aidiyyəti qurumlardan xahiş edirik, bu problemə nəhayət bir son qoyulsun,” – deyə ərazi sakini bildirir.
