Gəncədə yağan yağışlardan sonra şəhərin müxtəlif ərazilərində yolların bərbad vəziyyəti sakinlərin narazılığına səbəb olub.
Gencexeber.az-ın məlumatına görə, Sadıllı qəsəbəsinin küçələrini yağış suları basıb. Kanalizasiya sisteminin olmaması səbəbindən su yollarda toplanaraq nəqliyyat və piyadaların hərəkətini iflic edib.
Dos-84 ərazisində yerləşən hərbi şəhərcikdə də oxşar vəziyyət müşahidə olunur. Yol örtüyü dağılıb, iri gölməçələr əmələ gəlib. Bu səbəbdən ərazidə hərəkət təhlükəli hal alıb.
Gəncə şəhər 17 nömrəli tam orta məktəbə aparan Dos-102 ünvanında yollar qazıldıqdan sonra asfalt örtüyü bərpa edilməyib. Sakinlər və məktəbli valideynləri bu vəziyyətin şagirdlərin gündəlik gediş-gəlişinə çətinlik yaratdığını bildirirlər.
Mahrasa bağı adlanan yaşayış massivində yol örtüyü tamamilə yararsız hala düşüb. Yağışdan sonra bütün küçələr palçığa qərq olub, hərəkət demək olar ki, mümkünsüzləşib.
İlqar Həmzəyev küçəsində də yollar bərbad vəziyyətə düşüb. Palçıqlı yollar piyadaların təhlükəsiz hərəkətini xeyli çətinləşdirib.
