Gəncədə yol örtüyünün yenilənməsi prosesi sürücülər üçün əlavə problemlərə yol açıb.
Gencexeber.az məlumat verir ki, Gəncənin Şah İsmayıl Xətai prospekti ilə Dədə Qorqud küçəsinin kəsişməsində aparılan asfalt yenilənməsi işləri gözlənilən nəticəni verməyib. Yeni örtüyün köhnə asfaltla uyğunlaşdırılmaması yolda çıxıntıların yaranmasına səbəb olub.
Təqdim etdiyimiz görüntülərdən aydın olur ki, yeni asfalt örtüyü ilə köhnə səth arasında uyğunluq təmin edilməyib. Bu səbəbdən yolda iri çıxıntılar yaranıb ki, bu da avtomobillərin hərəkətində çətinliklərə gətirib çıxarır. Sürücülər yaranmış vəziyyətin nəqliyyat vasitələri üçün manevr imkanlarını məhdudlaşdırdığını və narahatlıq yaratdığını bildirirlər.
Qeyd olunan yol problemləri yalnız bu ərazi ilə məhdudlaşmır. Şəhərin digər hissələrində də oxşar hallar müşahidə olunur. Sakinlər məsələ ilə bağlı aidiyyəti qurumlardan nəzarətin artırılmasını və problemlərin operativ şəkildə aradan qaldırılmasını istəyirlər.
