Gəncədə avtomobil yoluna xətlər çəkilsə də, əks istiqamətə dönüş imkanının təmin edilməsi unudulub.
Gencexeber.az-ın məlumatına görə, Gəncə şəhərinin Yeni Gəncə yaşayış massivində, 28 May küçəsində yeni xətlənmiş yollarla bağlı narazılıqlar yaranıb. Şikayətçilərin sözlərinə görə, xüsusilə Novruz meydanından başlayan uzun məsafədə qırıq xətlərin olmaması səbəbindən hər iki istiqamətdə hərəkət edən avtomobillərin qanunla icazə verilən şəkildə əks istiqamətə dönməsi mümkün deyil. Bu isə nəinki yol hərəkəti iştirakçılarının manevr imkanlarını məhdudlaşdırır, həm də qəza riskini artırır.
Eyni zamanda, həmin ərazidə yaşayan vətəndaşlar da problemlə üzləşirlər. Onlar bildirirlər ki, yaxınlıqda yerləşən ünvana çatmaq üçün qısa məsafə əvəzinə, uzun bir məsafə qət etməyə məcbur qalırlar. Bu isə həm vaxt itkisidir, həm də əlavə yanacaq sərfiyyatına səbəb olur.
Sakinlər məsələ ilə bağlı aidiyyəti qurumların məsələyə müdaxilə edib, xətlənmənin düzgün və funksional şəkildə yenidən aparılmasını tələb edirlər.
