Gəncənin bir sıra ərazilərində su təchizatı ilə bağlı ciddi problemlər yaşanır.
Gencexeber.az-a daxil olan çoxsaylı şikayətlərə görə, şəhərin mərkəzi hissəsində, qəsəbələrində və digər yaşayış massivlərində su təminatı ilə bağlı kritik vəziyyət yaranıb. Sakinlər iddia edirlər ki, “Azərsu” ASC tərəfindən su fasilələrlə verilir, bəzi hallarda isə günlərlə ümumiyyətlə gəlmir.
Xüsusilə Azərbaycan Bayrağı küçəsində yerləşən Gəncə Yaşayış Kompleksində (MİDA) mövcud olan 986 mənzilin sakinləri arasında narazılıq daha yüksəkdir. Onların sözlərinə görə, qurumun qaynar xəttinə edilən zənglərə artıq cavab verilmir.
Gülüstan qəsəbəsinin İbrahim Əliyev küçəsində vəziyyət daha acınacaqlıdır. Sakinlər bildirirlər ki, illərdir normal su verilmir. Onların sözlərinə görə, yalnız bir gün ərzində 20 dəqiqə zəif su açılır, qalan vaxt isə içməli suyu xüsusi maşınlarla sifariş etməyə məcbur olurlar.
Oxşar vəziyyət Neman Vəliyev küçəsində də müşahidə olunur. Yayın qızmar günlərində sakinlər uzun müddət susuz qalmaqdan şikayət edirlər.
