Gəncə şəhərinin müxtəlif ərazilərində qurumuş ağaclar sakinlər üçün ciddi təhlükə mənbəyinə çevrilib.
Gencexeber.az-a daxil olan şikayətlərə əsasən, Əziz Əliyev və Neman Vəliyev küçələrinin kəsişməsində yerləşən iri çinar ağacının qurumuş budaqları uzun müddətdir ərazidə yaşayan və buradan keçən insanların narahatlığına səbəb olur. Sakinlərin sözlərinə görə, bir il əvvəl problemi aradan qaldırmaq üçün şəhərin Yaşıllaşdırma İdarəsinə müraciət edilsə də, bu müddət ərzində heç bir tədbir görülməyib. Məsələ xüsusi ilə təhlükəlidir, çünki ağacın altında avtobus dayanacağı yerləşir və hər gün onlarla insan ağacın altında nəqliyyat gözləyir.
Digər narahatlıq doğuran oxşar vəziyyət isə “Unibank” filialının qarşısı, Şahlar Hüseynov 2 ünvanında müşahidə olunur. Burada qurumuş şam ağacı qırılıb, aşma təhlükəsi aylardır davam edir. Sakinlər bildirirlər ki, bir müddət əvvəl həmin ərazidə başqa ağac quruyaraq gövdəsindən qırılaraq aşıb. Buna baxmayaraq, aidiyyəti quruma edilən müraciətlər cavabsız qalıb.
Sakinlər cavabdeh strukturlardan vəziyyətə dərhal müdaxilə olunmasını, təhlükəli ağacların və ya budaqlarının kəsilib ərazidən götürülməsini tələb edirlər.
