Gəncənin 5-ci mikrorayon ərazisində ciddi kommunal qəza baş verib.
Gencexeber.az-ın məlumatına görə, 7 nömrəli tam orta məktəbin yaxınlığında içməli su borusu partlayıb və nəticədə ətrafı su basıb. Hadisə bir neçə gündür davam edir. Sakinlərin sözlərinə görə, aidiyyəti qurumlara dəfələrlə müraciət edilsə də, problemin aradan qaldırılması üçün heç bir tədbir görülməyib.
Ərazidə yaşayanlar bildirirlər ki, 10-dan artıq çoxmənzilli bina müəyyən saatlarda su ilə təmin olunur. Məhz həmin vaxtlarda partlamış borudan su fontan şəklində püskürür.
“Gördüyünüz kimi, çirkab sular təmiz su xəttinə dolur” – şikayətçi bildirib.
Hazırda ərazidə nəqliyyatın və piyadaların hərəkəti çətinləşib. Sakinlər problemin təcili həllini tələb edirlər.
