Gəncə Beynəlxalq Avtovağzalında online bilet almış qadın sərnişin sürücülərin kobud rəftarına məruz qaldığını iddia edib.
Gencexeber.az-a şikayətini bildirən qadının sözlərinə görə, mayın 8-i saat 10:30 üçün biletim.az saytından 99-XX-858 dövlət nömrə nişanlı avtobusa bilet alıb. Lakin avtovağzala çatdıqda sürücü biletin etibarlılığına şübhə ilə yanaşıb və sərnişinə kobud şəkildə başqa avtobusa yönləndiriləcəyini deyib.
Sərnişin əvvəlcə 99-MM-858 nömrəli avtobusla yola düşüb, sonra isə 10-TG-168 nömrəli nəqliyyat vasitəsinə köçürülüb. Online biletdə göstərilən yerlərin isə artıq başqasına satıldığı məlum olub. Sərnişin ön sıradakı yer əvəzinə arxada əyləşdirilib. Həmçinin avtobusda kondisioner işləməyib, bu səbəbdən nəqliyyat vasitəsi qapısı açıq vəziyyətdə idarə olunub. Hətta yolda sərnişinlər avtobusdan endirilərək 5 dəqiqə müddətinə hava almaq üçün şərait də yaradılıb.
Qadın sözügedən halların şəhərlərarası sərnişindaşıma ilə məşğul olan şəxslərin arasında geniş yayıldığını da iddia edib.
