Gəncə şəhərinin Üzeyir Hacıbəyli küçəsində, Dos-84 kimi tanınan ərazidəki mövcud infrastruktur problemləri sakinlərin ciddi narazılığına səbəb olub.
Gencexeber.az-a daxil olan şikayətə əsasən, ərazidə yaşayanların sözlərinə görə, burada iki qəhrəman şəhidin şəkli olan plakat kanalizasiya xəttində baş vermiş nasazlıq nəticəsində çirkab sularının əhatəsində qalıb. Məlumatlara əsasən, kanalizasiya borusu partlayıb.
Bundan başqa, sakinlər bildirirlər ki, bu küçədə asfalt örtüyü sonuncu dəfə 2005-ci ildə çəkilib və hazırda tamamilə yararsız vəziyyətdədir. Dos-84-ə qədər olan hissə nisbətən təmir olunsa da, son 70-80 metrlik sahə illərdir asfaltlanmır.
Gəncə şəhərinin Üzeyir Hacıbəyli küçəsində də oxşar vəziyyət müşahidə edilir. Döngə 4, bina 1 ünvanında artıq bir həftədir kanalizasiya boruları partlayıb. Çirkab sular binaların zirzəmisinə axır. Bu vəziyyət ətrafda həm antisanitariya, həm də pis qoxulara səbəb olub.
Sözügedən məsələlərlə əlaqədar şikayətçilər bildirirlər ki, aidiyyəti qurumlara dəfələrlə məlumat verilsə də, problemlər hələ də aradan qaldırılmayıb. Sakinlər məsələnin operativ şəkildə həllini tələb edirlər.
