Avtozavod qəsəbəsində yerləşən köhnə qənd sexinin yaxınlığında yaşayan sakinlər tərəfindən su təchizatı ilə bağlı kütləvi şikayətlər edilir.
Gencexeber.az-a müraciət edən vətəndaşlar bildirirlər ki, artıq 4 aydır həmin əraziyə köçsələr də, bu müddətin yalnız bir ayında evlərə su verilib. Qalan vaxt ərzində isə tam susuz qalıblar.
İddialara əsasən, sözügedən ərazinin təchizatına cavabdeh olan su idarəsindən sakinlərə bildirilib ki, ərazidəki relyefin təpəlik olması səbəbindən suyun çatdırılması mümkün deyil. Həmçinin qeyd olunur ki, “büdcədə vəsait yoxdur” bəhanəsi ilə vətəndaşlara öz hesablarına su xətti çəkdirmələri tövsiyə olunur.
“Bizdən 5-6 ev aşağıda yaşayanlara su gəlir, amma bizim evlərə bir damcı belə çatmır. Evdə iki körpə uşaq var, yay istisində bu vəziyyətə dözmək olmur. Artıq bilmirik hara müraciət edək”, – sakin bildirib.
Sakinlər məsələ ilə bağlı aidiyyəti qurumlardan təcili tədbir görülməsini tələb edirlər.
