Gəncədə sahibsiz itlərə qarşı keçirilən əməliyyat şəhərdə ciddi ajiotaj yaradıb.
Gencexeber.az-ın əldə etdiyi videogörüntülərdə işçilərin küçə itlərinin arxasınca qaçdığı, digər kadrlarda isə onların xüsusi texnika ilə daşındığı əks olunub. Bir çox vətəndaş heyvanlara qarşı sərt münasibətdən narazı olduqlarını qeyd ediblər.
“Bu heyvanlar da canlıdır. Onların da yaşamaq haqqı var. Sahibsiz ola bilərlər, amma bu cür aqressiya ilə itlərin tutulması yolverilməzdir” — deyə Gəncə sakini bildirib.
Məsələ ilə bağlı redaksiyamız tərəfindən Mənzil Kommunal Təsərrüfatı İstehsalat Birliyinə ünvanlanan sorğuya cavab olaraq bildirilib ki, şəhər mərkəzində sahibsiz heyvanlarla bağlı yerli sakinlərdən daxil olan çoxsaylı müraciətlər əsasında tədbir görülüb. Qurum qeyd edib ki, heyvanlar hər hansı fiziki zərər yetirilmədən toplanaraq şəhərin kənarında buraxılıb.
Eyni zamanda vurğulanıb ki, yalnız mərkəz deyil, şəhərin digər ərazilərində də oxşar tədbirlər həyata keçirilir və bu proses sakinlərin şikayətləri əsasında davam etdirilir.
Qeyd edək ki, Gəncədə 2023-cü ildə yaradılan "Yuva" heyvan sığınacağı ötən ilin yanvarında maddi çatışmazlıqlar səbəbilə fəaliyyətini dayandırıb. Həmin sığınacaqda saxlanılan itlərin bir çoxu isə şəhər ərazisinə buraxılmışdı.
Hazırda Gəncədə sahibsiz heyvan problemi aktuallığını qoruyur.
