Gəncədə pərakəndə ticarət dövriyyəsində artım və azalmalar müşahidə olunub.
Gencexeber.az-a Gəncə Şəhər Statistika İdarəsindən verilən məlumata əsasən, 2025-ci ilin yanvar-mart aylarında şəhərin pərakəndə ticarət şəbəkəsində istehlakçılara ümumilikdə 392,5 milyon manat dəyərində məhsul satılıb. Bu məbləğin 256,2 milyon manatı ərzaq məhsulları, içkilər və tütün məmulatlarının, 136,3 milyon manatı isə qeyri-ərzaq mallarının payına düşür.
Ötən ilin eyni dövrü ilə müqayisədə pərakəndə ticarət dövriyyəsi real ifadədə 0,9 faiz artıb. Xüsusilə ərzaq məhsulları, içkilər və tütün məmulatları üzrə dövriyyə 21,6 faiz artım göstərib. Lakin qeyri-ərzaq mallarının satışında ciddi – 23,6 faiz azalma qeydə alınıb.
Dövriyyənin tərkibinə nəzər saldıqda isə, istehlak mallarının dəyər ifadəsində 23,1 faizi ticarət müəssisələri, 36,2 faizi bazar və yarmarkalar, 40,7 faizi isə fərdi sahibkarlar tərəfindən satılıb. Müqayisəli təhlillər göstərir ki, hüquqi şəxslər üzrə dövriyyə 20,5 faiz, bazar və yarmarkalarda satış isə 1,9 dəfə artıb. Əksinə, fərdi sahibkarlar üzrə ticarət dövriyyəsində 33,2 faiz azalma müşahidə olunub.
