Xəbər verdiyimiz kimi, Xaliq Mirzəyev Mehralı oğlu bir həftədən çox idi ki, 3-cü mikrorayon ərazisində – Elbrus Allahverdiyev və Şah İsmayıl Xətai prospektlərinin kəsişməsində yerləşən parkda skamyanın üstündə gecələyirdi.
Gencexeber.az məlumat verir ki, redaksiyamız tərəfindən məsələ ictimaiyyətin diqqətinə çatdırıldıqdan sonra adının açıqlanmasını istəməyən mərhəmətli Gəncə sakini yaşlı kişini öz evinə aparıb. Onun köhnəlmiş sənədlərinin yenilənməsi üçün müvafiq prosedurlar həyata keçirilib.
Bu gün səhər saatlarında isə Xaliq Mirzəyev müvafiq xidmətlərin vasitəsi ilə Bakıda qocalar evinə yerləşdirilməsi üçün aparılıb.
Qeyd edək ki, X.Mirzəyev daha əvvəl Gencexeber.az-a açıqlamasında 2002-ci ildə dələduzluq nəticəsində evini itirdiyini, mülksüz qaldığını və 23 ildir küçələrdə yaşadığını deyib. O, əvvəllər şəhər ərazisində daxmada qalsa da, sonradan oradan çıxarılıb. Qocalar evinə müraciət etsə də, yaşı 70-dən az olduğu üçün qəbul edilmədiyini bildirib.
