Gəncədə çoxmənzilli yaşayış binalarına edilən qeyri-qanuni konstruksiya dəyişiklikləri təkcə şəhər estetikasına yox, eyni zamanda vətəndaşların həyat və sağlamlığına da təhlükə yaradır.
Gencexeber.az-a daxil olan şikayətə əsasən, Azərbaycan bayrağı və İsaq Cəfərov küçələrinin kəsişməsində yerləşən 34 nömrəli binanın birinci mərtəbəsində aparılan artırma işləri həyəti tərk edən avtomobillər üçün ciddi problem yaradıb. Belə ki, həmin artırma nəticəsində sürücülər üçün tam mənada kor zona formalaşıb və bu səbəbdən baş verən yol-nəqliyyat hadisələri artıq adi hala çevrilib.
Ərazidə yaşayan şikayətçi bildirib ki, o da bu təhlükəli vəziyyətin qurbanlarından biridir. Onun sözlərinə görə, ötən ay idarəetdiyi “Toyota” markalı minik avtomobili qəfil qarşısına çıxan “Chevrolet” markalı avtomobillə toqquşub.
Hadisə zamanı o, günahkar kimi göstərilsə də, əslində qarşı tərəfdən gələn avtomobili görmək imkanının belə olmadığını bildirib: “Gözləyirdim ki, həyətdən çıxan zaman yolu rahat görə bilim, amma artırma elə yerə edilib ki, küçəni tamamilə örtür. O dəfə mən idim, sabah başqa biri olacaq – bu binanın altı artıq təhlükə mənbəyinə çevrilib”.
Sakinlərin şəhər rəhbərliyindən və müvafiq qurumlardan gözləntisi odur ki, məsələ operativ şəkildə araşdırılsın, qanunsuz artırmalar sökülsün və şəhər sakinlərinin təhlükəsizliyi təmin edilsin.
