Gəncə Dövlət Milli Dram Teatrı ilə Ozurgeti Milli Dram Teatrının birgə layihəsi çərçivəsində Nodar Dumbadzenin "Kukaraça" əsərinin premyerası baş tutub.
Gencexeber.az məlumat verir ki, layihə hər iki teatr arasında imzalanmış əməkdaşlıq memorandumuna əsasən hazırlanıb. Tamaşada Gürcüstan və Azərbaycan aktyorları birgə səhnə alaraq, eyni dialoqları bölüşüblər.
“Kukaraça” – Nodar Dumbadzenin eyniadlı povesti əsasında səhnələşdirilmiş tamaşadır. Əsərin baş qəhrəmanı – Kukaraça ləqəbli Georgi Tuşuraşvili polis inspektoru vəzifəsində çalışır. Lakin o, tipik bir hüquq-mühafizə orqanı əməkdaşı deyil. Kukaraça insanlara qarşı səmimi, qayğıkeş münasibəti, ədalətə və vicdana əsaslanan davranışı ilə seçilir. Əsər mənəviyyat, insanlıq və fədakarlıq kimi ali dəyərləri ön plana çəkir.
Layihənin bədii rəhbəri Azərbaycan Dövlət Akademik Musiqili Teatrının direktoru Aqil Bəhramlı, koordinatoru isə Gəncə Dövlət Milli Dram Teatrının aktyoru Yusif Cəfərovdur. Quruluşçu rejissor Gürcüstanın Əməkdar incəsənət xadimi, Ozurgeti Milli Dram Teatrının bədii rəhbəri və direktoru Vasili Ciqoqidze, quruluşçu rəssam Rustavi Teatrının baş rəssamı Lomqul Murusidze, səhnə tərtibatçısı Mirzə Mehdi, xoreoqraf isə Zeynəb Hüseynovadır.
Qeyd edək ki, tamaşada Gəncə Şəhər İcra Hakimiyyətinin başçısı Niyazi Bayramov, Gürcüstanın Gəncədəki Baş konsulu Kaxaber Abdaladze, Türkiyənin Gəncədəki Baş konsulu Recep Öztop, eləcə də idarə, müəssisə və təşkilat rəhbərləri qonaq qismində iştirak ediblər.
Tamaşa izləyicilər tərəfindən böyük maraq və rəğbətlə qarşılanıb.
