Gəncədə Təbriz küçəsinin bir hissəsində aparılan təmir işləri səbəbindən yol nəqliyyat üçün bağlanıb.
Gencexeber.az-ın məlumatına görə, Təbriz küçəsinin Gəncə şəhər 38 nömrəli tam orta məktəbin yerləşdiyi hissəsində kommunal xidmətlər tərəfindən yeraltı boruların çəkilməsi işləri aparılır. Sakinlərin sözlərinə görə, işlər bir neçə gündür davam edir və bu səbəbdən təxminən 400 metr uzunluğunda yolda nəqliyyatın hərəkəti məhdudlaşdırılıb.
Ərazidə xəbərdaredici nişan və süni maneələr yerləşdirilsə də, qəza riskləri mövcuddur.
"Burada xəbərdaredici lövhə var. Lakin artıq bir neçə yüngül qəza baş verib", – sakinlərdən biri bildirib.
Qeyd edək ki, sürücülər hazırda alternativ yol kimi Çarıxçılar küçəsindən istifadə edə bilərlər. Sakinlər və yol istifadəçiləri ümid edirlər ki, müvafiq qurumlar təhlükəsizlik tədbirlərini gücləndirəcək və işlərin uzanmasının qarşısını alacaqlar.
