Gəncədə küçə ticarətininin mövcudluğu qızğın müzakirələrə yol açır.
Gencexeber.az məlumat verir ki, Gəncə şəhərinin mərkəzi küçə və prospektlərində qanunsuz küçə ticarəti geniş vüsət alıb. Toyuq-cücədən tutmuş müxtəlif ərzaq məhsulların açıq havada satılması piyadaların sərbəst hərəkətinə ciddi maneə yaradır.
Xüsusilə Heydər Əliyev prospekti, Nizami Gəncəvi prospekti, Dədə Qorqud küçəsi və Musa Xələfov küçəsində (Abbas Səhhət adına Gəncə Şəhər Birləşmiş Xəstəxanası qarşısı) bu hal daha qabarıq şəkildə müşahidə olunur. Piyada səkilərinin və avtomobil yolunun bir hissəsinin satıcılar tərəfindən zəbt edilməsi narazılıqlara səbəb olur.
Sakinlər arasında bu məsələyə münasibət birmənalı deyil. Bir qrup vətəndaş alverçilərin fəaliyyətini məhdudlaşdırmağının düzgün olduğunu və şəhər küçələrində piyadaların sərbəst gediş-gəlişinin bərpa edilməsini tələb edir. Digər qrup isə küçə ticarəti ilə məşğul olan insanların sosial vəziyyətini əsas gətirərək onların peşələri ilə məşğul olmalarına göz yumulmasını istəyir.
Qeyd edək ki, Gəncə Şəhər İcra Hakimiyyətinin işçi qrupları tərəfindən pərakəndə ticarətin geniş yayıldığı ərazilərdə mütəmadi olaraq reydlər keçirilsə də, yerli sakinlərin sözlərinə görə, bu tədbirlər uzunmüddətli nəticə vermir. Həmən sonra sözügedən vətəndaşlar yenidən əvvəlki fəaliyyətlərinə qayıdırlar ki, bu da problemin davam etməsinə səbəb olur.
