Gəncədə kommunal xidmətin dağıtdığı asfalt örtüyü aylardır bərpa edilmir.
Gencexeber.az məlumat verir ki, sözügedən hal Yeni Gəncə qəsəbəsində yerləşən 61 nömrəli binanın qarşısında müşahidə edilir. “Azərsu” ASC-nin əməkdaşları ötən ilin oktyabr ayında su borusunun 5-ci blokun qarşısından keçən hissəsində baş verən qəzanı aradan qaldırmaq məqsədilə qazıntı işləri apararaq asfalt örtüyünü tamamilə yararsız hala salıblar.
Bu azmış kimi, təmir işləri zamanı binanı su ilə təchiz edən boru deşilib. Bu səbəbdən ekskavator vasitəsilə təmir işləri ərazisinin əhatəsi bir qədər də genişləndirilibr.
Ərazidən keçən xəttin və binanın zədələnən borusunun fəaliyyəti bərpa edildiklən sonra küçədə yol örtüyü olduğu kimi saxlanılıb. Asfalt örtüyündən isə əsər-əlamət belə qalmayıb. 44 saylı körpələr evi-uşaq bağçasının və 61 nömrəli binanın arasında qalan bu yol palçığa qərq olub. Piyada və avtomobillərin hərəkəti isə iflic vəziyyətdədir.
